Cerys yn Ennill Ysgoloriaeth Ben Muskett 2018

by Gwydion Davies | 24 Rhagfyr, 2018 | Uncategorized @cy

Cerys Edwards, disgybl yng Nghanolfan Gerdd William Mathias (cangen Rhuthun), sydd yn derbyn Ysgoloriaeth CGWM er cof am Ben Muskett eleni. Mae Cerys, sy’n 16 oed, yn cael gwersi piano gyda Teleri Siân.

Dywedodd Cerys, “Roedd yn dipyn o sioc i glywed fy mod wedi ennill Ysgoloriaeth Ben Muskett. Roeddwn newydd berfformio mewn cyngerdd gan rai o fyfyrwyr y Ganolfan ac ar ôl i mi berfformio cefais fy ngalw yn ôl i’r llwyfan i dderbyn tlws ac arian yr ysgoloriaeth.

Wrth longyfarch Cerys, dywedodd Meinir Llwyd, Cyfarwyddwr Canolfan Gerdd William Mathias, “Roedd Ben Muskett yn diwtor piano ysbrydoledig yn y Ganolfan. Ond, yn 25 oed, bu farw mewn damwain car yn 2011.”

Caiff yr Ysgoloriaeth ei dyfarnu’n flynyddol i bianydd addawol dan 18 oed sy’n derbyn gwersi yn CGWM. Yn ôl Meinir Llwyd, “Dyma’n ffordd ni o gynnal rhywfaint o’r angerdd yr oedd Ben yn ei deimlo am gerddoriaeth a dysgu plant a phobl ifanc.”

Meddai Cerys, “Mae’r ysgoloriaeth yn golygu gymaint i mi. Mi fydd yr arian o gymorth mawr er mwyn prynu darnau newydd piano yr hoffwn eu dysgu – yn cynnwys Waltzes Chopin, Preludes Debussy a darnau jazz hefyd.”

Mae Cerys yn derbyn gwersi Cerddoriaeth yn Ysgol Brynhyfryd gyda Miss Llinos Williams. Dechreuodd gael gwersi Piano pan oedd hi’n chwech oed gyda Mavis Johns, cyn cychwyn gwersi gyda Teleri-Siân yn 2012.

Yn ôl Cerys, “Rwyf wrth fy modd yn dod am wersi piano gyda Teleri Siân a gyda’i chymorth hi mi wnes i lwyddo i basio fy arholiad Gradd 8 yn ystod yr Haf gyda theilyngdod.”

Dywedodd Llinos, mam Cerys: “Rydan ni wedi bod yn ffodus iawn i gael tiwtoriaid piano o’r safon uchaf dros y blynyddoedd – mae fy mab Sion, ynghyd â chwaer Cerys, Cathrin, wedi mwynhau dod am wersi piano efo Teleri-Siân.”

Ym Mlwyddyn 9, enillodd Cerys y drydydd wobr yng Nghystadleuaeth Unawd Piano Blwyddyn 7-9 yn Eisteddfod Genedlaethol yr Urdd ym Mhen-y-Bont ar Ogwr. Mae hi hefyd yn aelod ffyddlon o Gôr Cytgan Clwyd.

Yng Nghaernarfon y mae prif gartref CGWM. Ond, ers 2012, mae’r Ganolfan wedi bod yn darparu gwersi cerdd ar nosweithiau Llun yn Theatr Twm o’r Nant, Dinbych ac, ers dros flwyddyn, hefyd yn cynnig gwersi yng Nghapel Tabernacl, Ruthun ar nosweithiau Mercher.

Cafodd tlws yr ysgoloriaeth ei gyflwyno i Cerys yng nghyngerdd ‘Llwyfan Cerdd’ CGWM yn Neuadd Bentref Pwllglas. Roedd y cyngerdd yn cynnwys perfformiadau gan ddisgyblion o bob oedran sy’n derbyn gwersi yn y Ganolfan, ynghyd ag ensembles Telynau Clwyd Iau ac Hŷn dan arweiniad Morwen Blythin a Dylan Cernyw.

Yn naturiol, roedd tiwtor piano Cerys, Teleri-Siân, wrth ei bodd o glywed y newyddion: “Mae wastad yn bleser i roi gwersi piano i Cerys yn y Ganolfan. Mae hi’n ddisgybl arbennig sy’n datblygu i fod yn berfformwraig a cherddor hyderus ag aeddfed.” 

Dyblu eich rhoddion at Doniau Cudd am wythnos yn unig

by Gwydion Davies | 25 Tachwedd, 2017 | Uncategorized @cy

Mae Canolfan Gerdd William Mathias,elusen sy’n ymroddi i ddarparu profiadau mewn cerddoriaeth i’r cyhoedd yn galw am gefnogaeth y gymuned leol a busnesau i helpu i gyrraedd targed codi arian o £ 3,000 a fydd yn cael ei dyblu yn ystod Her Nadolig 2017 y Big Give.

Bydd unrhyw roddion a wneir ar-lein i Ganolfan Gerdd William Mathias rhwng y 28ain o Dachwedd a’r 5ed o Ragfyr yn cael eu dyblu ac yn cyfrannu at barhad ‘Doniau Cudd’, sef prosiect sy’n darparu cyfleoedd cerddorol i oedolion ag anableddau o ardal Caernarfon.

Mae’r prosiect wedi’i gynnal yn llwyddiannus ers dros 10 mlynedd ac mae wedi dod yn rhan hynod bwysig o fywydau dros 30 o gyfranogwyr sy’n mynychu sesiynau wythnosol yn Galeri Caernarfon. Fe’i sefydlwyd yn 2003 gan y Ganolfan Gerdd a’r cerddor Arfon Wyn gyda chefnogaeth Cyngor Celfyddydau Cymru a Gwasanaethau Cymdeithasol Cyngor Gwynedd. Mae unigolion lleol sy’n byw gydag anableddau yn elwa’n gymdeithasol ac yn addysgol. I rai cyfranogwyr, mae cerddoriaeth yn cynnig dull cyfathrebu naturiol yn absenoldeb lleferydd. Mae manteision eraill yn cynnwys adeiladu hyder a chyfleoedd i ryngweithio’n gymdeithasol.

Gwyliwch y ffilm yma am flas o’r prosiect.

Dywedodd y cerddor ac arweinydd y sesiynau, Arfon Wyn: “Rydw i’n cael boddhad mawr wrth weithio gyda ‘Doniau Cudd’, rydym ni’n byrfyfyrio’n gerddorol gyda’n gilydd ac wedi gwneud ffrindiau am oes”.

Ers 2012 mae’r prosiect wedi ehangu i Bwllheli a Sir Ddinbych ac yn 2013 dyfarnwyd Gwobr Gofal Cymru Ymddiriedolaeth Bryn Terfel i’r prosiect am hyrwyddo’r Celfyddydau mewn Gofal Cymdeithasol.

Dywedodd Nia Hughes o Ganolfan Gerdd William Mathias: “Mae’r prosiect yn ysbrydoliaeth go iawn i bawb sy’n gysylltiedig ag o. Mae’r unigolion sy’n mynychu’n cael cyfle i fynegi eu hunain trwy gerddoriaeth, ac yn aml yn perfformio i’r cyhoedd mewn digwyddiadau a gynhelir gan Ganolfan Gerdd William Mathias. Mae’n werth i weld eu hwynebau wrth berfformio, sy’n pwysleisio pwysigrwydd y prosiect hwn. Plîs cefnogwch os gallwch chi.”

Mae’r elusen yn gweithio’n ddiflino i sicrhau cyllid o hyd at £14k yn flynyddol i gynnal y prosiect hwn. I gefnogi Doniau Cudd a helpu i barhau i gyfoethogi bywydau pobl sy’n byw gydag anableddau, cyfrannwch ar lein i Ganolfan Gerdd William Mathias rhwng 28 Tachwedd – 5 Rhagfyr 2017. Am ragor o wybodaeth, cysylltwch â Canolfan Gerdd William Mathias ar 01286 685 230

Gwledd o Gerddoriaeth yn Rhuthun!

by Gwydion Davies | 25 Tachwedd, 2017 | Uncategorized @cy

MAE GWLEDD O GERDDORIAETH wedi ei threfnu fel rhan o gyngerdd arbennig a gynhelir yn Theatr John Ambrose, Rhuthun ar y 3ydd o Chwefror 2018 am 7:30yh.

Bydd y cyngerdd, a drefnir gan Canolfan Gerdd William Mathias yn dathlu bod y Ganolfan Gerdd wedi cychwyn darparu gwersi cerddoriaeth yn Rhuthun fel rhan o ymdrechion yr elusen i ehangu ei darpariaeth yn y Gogledd Ddwyrain. Mae’r Ganolfan, sydd â’i phencadlys yn Galeri Caernarfon wedi bod yn darparu gwersi cerdd yn Theatr Twm o’r Nant Dinbych ers sawl blwyddyn bellach ac yn falch o ehangu i Rhuthun.

Bydd y cyngerdd yn cynnwys perfformiadau gan diwtoriaid y Ganolfan, cyn-fyfyrwyr sydd wedi mynd ymlaen i astudio mewn colegau cerdd a Chôr Cytgan Clwyd. Ymhlith yr artistiaid bydd Rhys Meirion, Elinor Bennett, Ann Atkinson, Alfred Barker, Glian Llwyd, Teleri Siân, Morwen Blythin, Dylan Cernyw, a Kate Griffiths.

Dywedodd y tiwtor llais  Ann Atkinson sydd hefyd yn Gyfarwyddwraig Gŵyl Gerdd Ryngwladol Gogledd Cymru ac yn arwain Côr Trelawnyd a Chôr Meibion Bro Glyndwr:

“Rydw i wedi bod yn dysgu i Ganolfan Gerdd William Mathias ers 2012 pan gychwynnon ni ddarparu gwersi yn Theatr Twm o’r Nant Dinbych. Mae’n wych i weld y Ganolfan yn ehangu’r ddarpariaeth drwy gynnig gwersi hefyd yn Rhuthun.

“Rwy’n edrych ymlaen at rannu’r llwyfan â’r tiwtoriaid eraill ynghyd â rhai o’r myfyrwyr rwyf wedi bod yn eu dysgu yn Ninbych sydd wedi mynd ymlaen i astudio’r llais mewn colegau cerdd.”

Bydd tri o gyn-ddisgyblion disglair Ann yn cymryd rhan yn y cyngerdd – Tesni Jones a Lisa Davies sydd wedi mynd ymlaen i astudio’r llais yn y Royal Northern College of Music, a Steffan Davies sydd bellach yn astudio cerddoriaeth a Chymraeg ym Mhrifysgol Bangor.

Yn ôl un o diwtoriaid piano y Ganolfan Teleri Siân, sy’n byw yn Llanfair Dyffryn Clwyd, mae Canolfan Gerdd William Mathias yn gweithio’n galed i ddatblygu ei darpariaeth newydd yn Rhuthun. Dywedodd:

“Rydym wedi cychwyn trwy gynnig gwersi piano, llais, theori a ffidil yn Rhuthun i blant ac oedolion, ond rydym yn bwriadu ehangu’r ddarpariaeth i gynnwys gwersi ar amrediad eang o offerynnau eraill felly mae’n bwysig bod pobl yn cysylltu i fynegi eu diddordeb. Byddwn hefyd yn datblygu ein darpariaeth o weithgareddau cerdd grŵp yn ystod y misoedd nesaf.”

Mae’r prosiect Camau Cerdd – sef grwpiau cerdd i blant bach eisoes yn cael ei gynnal yn Ninbych mewn partneriaeth gyda Menter Iaith Sir Ddinbych a Gwasanaethau Celfyddydol Sir Ddinbych. Cynhelir grŵp i blant 6 mis – 3 oed am 1.45yp yn Hwb Dinbych a grŵp i blant 4 – 7 oed yn Theatr Twm o’r Nant ar ôl ysgol ar ddyddiau Llun.

“Mi fydd noson arbennig hon o gerddoriaeth ar y 3ydd o Chwefror yn helpu i godi ymwybyddiaeth bod gwersi cerdd nawr ar gael yn Rhuthun. Dewch i fwynhau’r wledd o gerddoriaeth!”

Mae tocynnau ar gyfer cyngerdd ‘Gwledd o Gerddoriaeth’ ar y 3ydd o Chwefror, 7:30yh yn Theatr John Ambrose ar gael o Siop Elfair, Rhuthun ac o Siop Clwyd, Dinbych. Prisiau’r tocynnau ydy £7, £6 (pensiynwyr), £3 (plant).

Atgofion ar Gân i gychwyn yn Bethesda a Deiniolen

by Gwydion Davies | 24 Hydref, 2017 | Uncategorized @cy

Ers mis Tachwedd 2016, mae Canolfan Gerdd William Mathias wedi bod yn cynnal sesiynau cerddorol gyda thrigolion hŷn Gellilydan ac Awel y Coleg, Y Bala dan arweiniad Nia Davies Williams. Gwahoddwyd plant o’r ysgolion cynradd lleol i gymryd rhan mewn sesiynau Camau Cerdd gyda Marie-Claire Howorth cyn ymuno i gyd-ganu a mwynhau gweithgareddau cerddorol gyda’r bobl hŷn.

Ers y comisiwn gan Uned Celfyddydol Cymunedol Cyngor Gwynedd mae’r sesiynau wedi helpu dod a phobl at ei gilydd i hel atgofion a mwynhau cerddoriaeth, yn ogystal â chodi hyder a chynnig cyfle i gyfarfod pobl newydd.

Mae’n bleser gennym gyhoeddi y bydd y sesiynau yn ymestyn i ardaloedd Bethesda a Deiniolen diwedd mis Hydref. Mae’r sesiynau’n agored i unrhyw drigolion hŷn ddod draw am baned a chân ac i gwrdd â phobl newydd. Bydd sesiynau Bethesda yn dechrau ar Hydref 27, 10:30 – 11:30 yn Neuadd Ogwen, ac yna bob yn ail wythnos wedi hynny. Yn yr un modd, bydd sesiynau Deiniolen yn dechrau ar Hydref 27, 14:00 – 15:00 yn Nhŷ Elidir. Bydd paned ar gael ar ddiwedd pob sesiwn a bydd plant o’r ysgolion lleol yn ymuno Gwanwyn 2018.

Gwyliwch y ffilm yma am hanes y gweithgareddau diweddar yn Y Bala a Gellilydan. Am unrhyw wybodaeth pellach, cysylltwch â Canolfan Gerdd William Mathias ar 01286685230

Côr Siambr CGWM: Croeso i aelodau newydd!!

by Gwydion Davies | 1 Hydref, 2017 | Uncategorized @cy

Bu Côr Siambr Canolfan Gerdd William Mathias yn cymryd rhan mewn cyngerdd yng Nghadeirlan Llanelwy dydd Sul y 24 Medi fel rhan o Gorws Opera Genedlaethol Cymru gan ganu’r premiere Cymreig gan Oliver Tarney a Paul Mealor.

“Roedd hwn yn brofiad gwych i’r côr i fod yn rhan o gorws yr Opera Genedlaethol ac i ganu mewn lleoliad mor anhygoel â Chadeirlan Llanelwy” meddai Jenny Pearson, arweinydd y côr.

Mae Jenny Pearson wedi bod yn arwain Côr Siambr Canolfan Gerdd William Mathias ers bron iawn i ddegawd bellach, a dan ei arweinyddiaeth, mae’r côr wedi gweld nifer o lwyddiannau, gan gynnwys cymryd rhan mewn taith gyfnewid gyda chôr Incantanti o’r Swistir dim ond y llynedd.

Mae rhai o berfformiadau mwyaf uchelgeisiol a llwyddiannus y Côr yn cynnwys: Bach Magnificat, Handel Zadok the Priest, Fauré Cantique de Jean Racine ac Offeren Mozart.

Mae’r Côr wedi cyflawni amryw o berfformiadau llwyddiannus, gyda rhai aelodau wedi mynd ymlaen i ganu gyda Chôr Cenedlaethol Ieuenctid Cymru, Opera Ieuenctid WNO, ac ymlaen i golegau cerdd adnabyddus.

Gydag amryw o aelodau’r côr wedi mynd ymlaen i astudio mewn prifysgolion a cholegau cerdd ym mis Medi, mae’r côr yn awr yn awyddus iawn i ddenu aelodau newydd i ymuno â’r tîm.

Mae’r côr yn agored i gantorion rhwng 12 – 25 oed, a mae Jenny Pearson yn awyddus i bwysleisio nad oes angen profiad blaenorol o fod mewn corau er mwyn ymuno:

“Mae’r Côr Siambr CGWM yn agored i bawb – does dim angen profiad blaenorol, does dim angen bod yn derbyn gwersi llais, a does dim clyweliad. Os yw eich plentyn yn ‘geek’ cerddorol o unrhyw fath, mi fydden nhw wrth eu boddau! Mae bod yn rhan o’r côr hefyd o fudd i’r rhai sydd yn dysgu offerynnau – gan eu helpu efo sain glust a darllen ar yr olwg gyntaf.”

Cynhelir ymarfer cyntaf y gyfres yn rhad ac am ddim, ar nos Iau y 5ed o Hydref rhwng 4:45 – 6:00yh, yn SP3, Galeri Caernarfon.

Mi fydd yr ymarfer cyntaf yma am ddim, yn rhoi cyfle da i blant rhoi cynnig ar y côr cyn cofrestru i’r tymor, ynghyd â rhoi cyfle i gael sgwrs anffurfiol efo Jenny.

Penodi Catrin Morris Jones fel Trefnydd Gŵyl Delynau Ryngwladol Cymru 2018

by Gwydion Davies | 15 Awst, 2017 | Uncategorized @cy

Rydym yn falch iawn o benodiad diweddar y Delynores Catrin Morris Jones fel Trefnydd Gŵyl Delynau Ryngwladol Cymru 2018. Bydd Catrin yn gweithio yn agos ag Elinor Bennett dros y misoedd nesaf ar yr Ŵyl fydd yn cael ei chynnal rhwng 1af – 7fed Ebrill 2018.

Gyda dros ugain mlynedd o brofiad fel telynores broffesiynnol yn Llundain, bellach mae Catrin yn byw gydai’i theulu ym Mhwllheli ac yn athrawes delyn yng Nghanolfan Gerdd William Mathias ers 2015.

Dywedodd  Catrin: “Rwy’n falch iawn o gyd-weithio gydag Elinor Bennett, Cyfarwyddwraig yr Ŵyl, ac yn edrych ymlaen i weithio â staff Canolfan Gerdd William Mathias a gwirfoddolwyr lleol i greu Gŵyl gyffrous a llwyddiannus.”

Trefnir yr Ŵyl gan CGWM a bydd yn wledd o gyngherddau, cystadleuthau a dosbarthiadau meistr i ddathlu penblwydd y telynor byd enwog,  Osian Ellis yn 90 oed.

Meddai Elinor Bennett, Cyfarwyddwraig yr Ŵyl:

“Rwyf yn hapus iawn fod Catrin wedi ymuno â’r tîm sydd yn trefnu Gwyl Delynau Ryngwladol Cymru IV ym mis Ebrill nesaf. Mae ganddi brofiad helaeth o drefnu digwyddiadau ym maes y delyn ac edrychaf ymlaen yn fawr at gael ei chymorth a’i hegni i sicrhau fod yr Ŵyl Delynau  yn mynd o nerth i nerth ac yn denu cannoedd o delynorion o  lawer gwlad i Gaerenarfon ym mis Ebrill.”

Am ragor o wybodaeth am yr Ŵyl, ewch i wefan: Gŵyl Delynau Cymru

Llwyddiannau disgyblion CGWM yn Eisteddfod Genedlaethol Môn

by Gwydion Davies | 11 Awst, 2017 | Uncategorized @cy

Llongyfarchiadau mawr i holl ddisgyblion y Ganolfan oedd yn cystadlu yn yr Esiteddfod eleni.  Dyma restr o’r buddugwyr yn cynnwys disgyblion presennol a chyn-ddisgyblion:

Unawd Llinynnau dan 16 oed:
Gwydion Rhys

Unawd piano dan 16 oed:
Gwydion Rhys
Medi Morgan

Deuawd offerynnol:
Rhiain Awel Dyer & Chloe Roberts
Gwenno a Medi Morgan

Unawd i ferched 16-19 oed:
Tesni Jones
Lisa Dafydd

Unawd i fechgyn 12-16 oed:
Tomi Llewelyn

Unawd Telyn dan 19 oed:
Elain Rhys

Unawd mezzo-soprano 19-25 oed:
Morgana Warren-Jones

Unawd Piano dros 19 oed:
Gwenno Glyn

Unawd Telyn dros 19 oed:
Glain Dafydd

Rhuban Glas Offerynnol dros19 oed:
Glain Dafydd

Diwrnod Agored CGWM yn Galeri Caernarfon 22/7/17

by Gwydion Davies | 18 Gorffennaf, 2017 | Uncategorized @cy

Cynhelir Diwrnod Agored Canolfan Gerdd William Mathias yn Galeri Caernarfon dydd Sadwrn Gorffennaf 22ain rhwng 10 -4yp. Bydd amrywiaeth o ddigwyddiadau rhad ac am ddim ymlaen i bobl ifanc drwy gydol y dydd i roi blas o’r hyn a gynnigir gan y Ganolfan.

Sefydlwyd y Ganolfan egnïol hon yng Nghaernarfon yn 1999 sy’n darparu cyfleoedd arbennig mewn addysg gerddorol i bobl o bob oed a gallu drwy wersi offerynnol a lleisiol gan diwtoriaid profiadol, gwersi theori, ensembles, corau a llawer mwy!

Un o uchafbwyntiau’r Diwrnod Agored fydd dathlu penblwydd ‘Camau Cerdd’ yn 10 oed.  Mae Camau Cerdd yn brosiect arbennig sy’n cyflwyno elfennau cerddoriaeth mewn ffordd hwyliog ac addysgol i blant ifanc o 6 mis hyd at 7 mlwydd oed. Am 1 o’r gloch bydd dosbarth i blant rhwng 4-7 oed, a dosbarth i blant rhwng 6 mis a 4 oed a’i rhieni am 2 o’r gloch.  I ddilyn, am 2:45yp byddem yn mwynhau perfformiadau cerddorol gan gyn-ddisgyblion a thiwtoriaid y prosiect mewn parti gyda gemau a chacen.

Sefydlwyd y prosiect gan Canolfan Gerdd William Mathias a’r cerddor Marie-Claire; sy’n fyfyrwraig ôl-raddedig ym Mhrifysgol Sheffield yn astudio MA mewn Seicoleg Cerddoriaeth mewn Addysg. Mae’r cynllun wedi llwyddo i ddod a chwricwlwm cerddorol ysbrydoledig i gymunedau yng ngogledd Cymru gan gyrraedd meithrinfeydd, cartrefi nyrsio ac ysgolion. Dywedodd Marie-Claire:

“Mae’n gyffrous i weld sut mae’r ffordd yr ydym wedi defnyddio cerddoriaeth i rymuso unigolion wedi cael effaith mor gadarnhaol ar gymaint o bobl.  Fel tiwtor cerdd ‘dwi mor falch o weld cyn-ddisgyblion y prosiect yn tyfu o fewn cymunedau cerddorol, ac yn edrych ymlaen i’w clywed yn perfformio ar y diwrnod”

Cynhelir dau weithdy yn ystod y diwrnod, sef gweithdy chwythbrennau gyda’r tiwtoriaid Rhiannon Mathias, Marie-Claire ac Elin Roberts am 10yb, a Dosbarth Meistr llais gyda’r tenor Huw Llywelyn am 2yp.  Mae cynnig cyfleoedd i ddisgyblion ifanc ddysgu mewn grwp yn bwysig i’r Ganolfan ac yn gyfle i unigolion berfformio a chydweithio gyda cherddorion eraill sy’n rhannu’r un diddordeb.

Hefyd yn ystod y diwrnod bydd yna wersi blasu am ddim yn cael eu cynnig ar y drymiau, gitar a phiano gan ein tiwtoriaid Graham ‘La’ Land, Neil Browning a Diana Keyse.  Yn ogystal ceir perfformiadau byw gan ddisgyblion a thiwtoriaid yng Nghaffi Bar Galeri.  Os yw’r tywydd yn caniatau, bydd y diwrnod yn diweddu gyda pherfformiad gan Doniau Cudd ac Arfon Wyn ar y Doc am 3:30yp. Cynhelir y digwyddiad gyda chefnogaeth Tŷ Cerdd.  Bydd pob digwyddiad am ddim, a mae yna groeso cynnes i bawb.  I ddatgan eich diddordeb, neu am wybodaeth bellach cysylltwch â Canolfan Gerdd William Mathias ar 01286 685 230.

Cyngerdd Haf 2017

by Gwydion Davies | 1 Gorffennaf, 2017 | Uncategorized @cy

Cynhaliwyd ein cyngerdd Haf eleni yn Neuadd Powis, Prifysgol Bangor ar ddydd Sul braf ar y 18fed o Fehefin.

Cafwyd perfformiadau gan ddisgyblion ifanc a disglair CGWM yn ogystal â’r pedwarawdau ac ensemblau llinynnol dan arweiniad Nicki Pearce.

Eto eleni, dyfarnwyd gwobrau arbennig i unigolion o’r Ganolfan.
Ysgoloriaeth er cof am Ben Muskett, oedd yn cydnabod pianydd ifanc a brwdfrydig, a dwy wobr er cof am gyn aelodau Côr Meibion Caernarfon i’r disgyblion oedd wedi ennill y marciau uchaf yn arholiadau’r ABRSM.

Enillwyr:

Ysgoloriaeth Ben Muskett: Gwydion Rhys – Piano

Gwobr coffa Thomas William Jones: Leisa Lloyd-Edwards – Llais gradd 1

Gwobr coffa Noel ab Owen Roberts: Ynyr Pritchard – Fiola gradd 8

Hoffwn longyfarch y tri am eu llwyddiant a’u perfformiadau ac i bawb a gymerodd rhan yn y cyngerdd. Mae’n wir i ddweud na fydd y dyfodol yn brin o dalent.

Diwrnod Agored Canolfan Gerdd William Mathias Dinbych!

by Gwydion Davies | 26 Mehefin, 2017 | Uncategorized @cy

Cynhelir Diwrnod Agored gan Canolfan Gerdd William Mathias yn Theatr Twm o’r Nant, Dinbych ar ddydd Sul y 9fed o Orffennaf.

Bydd amrywiaeth eang o ddigwyddiadau yn cael eu cynnal drwy gydol y dydd gan gynnwys gwersi blasu am ddim ar y delyn, ffidil, canu a piano, sesiynau ‘Camau Cerdd’, sef prosiect i blant bach, Ensemble Telynau Iau i delynorion ifanc, ac i orffen cyngerdd gan fyfyrwyr presennol y Ganolfan Gerdd.

Bydd y diwrnod yn cychwyn gyda sesiwn blasu Camau Cerdd gyda’r tiwtor Charlotte Amy Green. Mae’r prosiect yn cyflwyno cerddoriaeth mewn modd sy’n llawn hwyl a dychymyg i blant bach. Bydd sesiwn i blant 15 mis – 3 mlwydd oed yn cael ei gynnal am 10:30yb, ac yna sesiwn i blant 4 – 7 oed i ddilyn am 11:30yb. Bydd y sesiwn blasu am ddim, ond mae angen archebu eich lle o flaen llaw.

Mae cyfres Camau Cerdd wedi bod yn cael ei gynnal yn Ninbych ers dwy flynedd bellach gyda prosiect yn cael ei gynnal yn Hwb Dinbych a Theatr Twm o’r Nant yn y prynhawniau yn ystod y tymor ysgol.

Bydd yr Ensemble Telynau Iau yn dilyn dan arweiniad Morwen Blythin a Dylan Cernyw ar gyfer telynorion ifanc hyd at safon gradd 3. Yn dilyn llwyddiant y prosiect ‘Telynau Clwyd’ sy’n cyfarfod unwaith y mis yn Hwb Dinbych, y diben yw medru ffurfio ensemble telynau i delynorion iau hefyd.

Dywedodd Morwen Blythin, un o arweinwyr y grŵp:

“Rwy’n edrych ymlaen at ddiwrnod agored CGWM Dinbych er mwyn cael cychwyn ensemble telyn newydd i delynorion iau. Mae ymarfer yn dasg unig weithiau ac felly mae cyfle yma i gyd-chaware â thelynorion eraill a chael hwyl fuddiol iawn ar gyfer telynorion yr ardal.”

Yn ychwanegol i’r prosiectau hyn, bydd cyfleoedd i dderbyn gwersi blasu am ddim gyda athrawon profiadol Canolfan Gerdd William Mathias. Yn ystod y diwrnod agored fe gynnigir gwersi blasu ffidil gyda Alfred Barker, telyn gyda Morwen Blythin, canu gyda Ann Atkinson a piano gyda Teleri-Siân.

Yn ôl Alfred Barker, tiwtor ffidil, “Mae’r diwrnod agored hwn yn gyfle gwych i bobl sydd wedi bod yn meddwl am gychwyn offeryn neu lais i gael gwers am ddim ac i gyfarfod y tiwtoriaid sydd gennym ni yma yng Nghanolfan Gerdd William Mathias.”

Bydd angen archebu lle o flaen llaw ar gyfer y gwersi blasu drwy ffonio swyddfa CGWM.

I orffen y diwrnod cynhelir cyngerdd ‘Llwyfan Cerdd’ sef cyngerdd anffurfiol gan fyfyrwyr presennol y Ganolfan. Bydd tocynnau ar gyfer y cyngerdd yn cael eu gwerthu ar y drws.

Er mwyn archebu eich gwers blasu am ddim, neu i archebu lle eich plentyn ar brosiect Camau Cerdd neu’r Ensemble Telynau Iau (am ddim), cysylltwch â Chanolfan Gerdd William Mathias ar 01286 685 230 neu ar ebost.